ЮНЕСКО Ассоциированнай оскуолаларын кэккэлэригэр киирдибит

Ахсынньы 7 күнүгэр Чурапчы сэлиэнньэтигэр биир ураты күн үүннэ .Ол курдук Улыбка уһуйаан үлэтинэн хамнаһынан, ситиһиилэринэн,  Норуоттар икки ардыларынааҕы ЮНЕСКО Ассоциированнай оскуолаларын кэккэлэригэр киирбит мэктиэ суругу тутар дьоро күнэ ыытылынна.  Мэктиэ суругу үөрүүлээх быһыыга-майгыга  СӨ Үөрэҕириитин үтүөлээх үлэһитэ, Арассыыйа Судаарыстыбаннай Премиятын лауреата, СӨ ЮНЕСКО дьыалаларынан хамыыһыйа эппиэтинэстээх сэкиритээрэ Сидорова Елизавета Алексеевна таһаарыылаах үлэлээх тэрилтэбит салайааччытыгар Иванова Екатерина Семеновнаҕа туттарда. ЮНЕСКО Ассоциированнай оскуолаларын кэккэлэригэр мэктиэ суруктар Арассыыйа үрдүнэн аҕыс үөрэх тэрилтэтигэр бэриллибититтэн, сэттэ оскуолаҕа, биир уһуйааҥҥа анаммытын, ол уһуйаанынан  Чурапчытааҕы  “Улыбка” тиксибитэ чахчы даҕаны үлэ, үөрэх, сайдыы  таһыма  үрдүгүн тоһоҕолоон сэһэргээтэ.

Уһуйааммыт 2015 сылтан ЮНЕСКО ыытар политикатын өйдөөн, ыытыллар тэрээһиннэригэр кыттыбытпыт. Бу кэм устатыгар ситиһиллибит  үлэни быыстапка, маастар кылаас быһыытынан ыалдьыттарга көрдөрөн иһитиннэрэн үөрүүбүтүн үллэһиннибит. Чурапчы улууһун баһылыга Андрей Тимофеевич Ноговицын, СӨ ЮНЕСКО сэкиритээрэ Елизавета Алексеевна Сидорова, улуустааҕы үөрэх управлениетын начаалынньыга Тамара Васильевна Павлова олус сэҥээрэн, хас биирдии оҕоҕо, иитээччигэ болҕомто ууран, сэһэргэһэн  сөхтүлэр, астыннылар. Маны сэргэ үс тылынан иитиллээччилэрбит, иитээччилэрбит сатабылларын, кыахтарын тэттик нүөмэрдэринэн киэргэттилэр.

Бу тэрээһин чэрчитинэн, ый инниттэн регион хабааннаах  уруһуйга уонна английскай тылынан оҕо сатабылын сайыннарар сыаллаах конкурустар ыытылыннылар. «Наследие ЮНЕСКО в России глазами детей» конкурска Дьокуускай куораттан, Нам, Таатта, Мэҥэ-Хаҥалас, Уус-Алдан, Хаҥалас, Амма, Горнай, Өлүөхүмэ, Чурапчы улуустарыттан уопсайа 109 үлэ кыттыыны ылла.  «Kids Speak English» английскай тылынан ырыаҕа, хоһооҥҥо конкурска Дьокуускай куораттан, Нам, Таатта, Мэҥэ-Хаҥалас, Уус-Алдан,Чурапчы улуустарыттан 29 кыттааччы сатабылларын видеоҕа устан интернет ситиминэн кыттыыны ыллылар.

Туох ураты суоллаах-иистээх уһуйаан буолан бу үрдүк ситиһиигэ таҕыстыбыт диир буоллаххытына  “2003-2015 сылларга саха омук бэлиэтинэн, семиотикатынан дьарыктанан кэлбиппит.  2015 сыллаахтан хандьыдаат быһыытынан ЮНЕСКО ыытар хайысхаларынан араас тэрээһиннэргэ кыттан, бырайыактарга үлэлэһэн, сылга иккилиитэ отчуот туттарбытпыт. Ол түмүгэр, быйыл ЮНЕСКОҕа чилиэнинэн киирбиппитин туоһулуур сэртипикээти туттардылар.

Бу тэрээһин уһуйааммыт сүҥкэн  үрдэли дабайбытын туоһулуур,  сайдыыга өссө биир  киэҥ аартык  арыллыбытын кэрэһэлиир.